إزاي أحدد احتياجات شعري والمنتجات المناسبة ليه؟؟

إزاي أحدد احتياجات شعري والمنتجات المناسبة ليه؟؟

هركز هنا على أهم 3 معايير:

- الcurl pattern شكل\مظهر الشعراية  

- مسامية الشعر

- مستوى البروتين في الشعر

1. مظهر الشعر (الcurl pattern)

-أول صورتين بيوضحوا أشكال الشعر متقسمة ازاي بالأرقام والحروف بدْا من 1 ل4.

-ضروري أعرف شعري بينتمي لأي فئة من دول لأن كل نوع منهم غالبًا بيحتاج لحاجة مختلفة. مثلًا

- 2 (A,B Wavy) غالبًا بيكون طري لكنه مش بيحتفظ بشكل اللولوة لمدة طويلة

- 3 (A,B,C Curly) بيحتفظ بشكله لمدة أطول لكنه بيجف بسرعة

- 4 (A,B,C Coily) بيحتفظ بشكله بسهولة لكنه بينشف بسرعة وبيكشّ :D

*ملاحظة: ممكن الشعر يبقى وسط بين نوعين أو في أجزاء نوع وأجزاء نوع تاني

* ملاحظة تانية: ممكن الشعر يكون في الأساس بينتمي لنوع من دول لكنه يفقد شكله الحقيقي بسبب الفرد المستمر بالمكوى أو الكيراتين

- تاني معيار لتحديد احتياجات الشعر هو درجة مساميته:

مسامية الشعر هي شكل الغلاف الخارجي لكل شعراية وده بيحدد قدرتها على امتصاص الترطيب والاحتفاظ بيه. (انظر صور 3 و4 :D )

- أنواع الشعر بتنقسم ل3 فئات من حيث المسامية

1. شعر مرتفع المسامية: وده مسام الشعر بتكون مفتوحة وبعيدة عن بعضها وده بيسمح للشعر يمتص المية والترطيب بسرعة لكنه بردو بيفقدهم بسرعة لأن المسام مفتوحة, فبنحتاج نقفل على الترطيب جوه الشعر بزيت. الشعر ده بيقبل الزيوت التقيلة زي جوز الهند والخروع.

2. شعر متوسط المسامية: بيمتص الترطيب بدرجة متوسطة وبيفقده بدرجة متوسطة بردو، وده بيكون أسهل نوع في التعامل.

3. شعر منخفض المسامية: مسام الشعر بتكون مقفولة وقريبة جدًا من بعض وده بيخلي الترطيب ميوصلش لداخل الشعراية والكريمات والزيوت بتتراكم فوقيه فبيفضل ناشف، عشان كده  بيحتاج حرارة قبل ما نحط أي مرطب (بخار ماء مثلًا) عشان المسام تتفتح ويوصلها الترطيب. كمان النوع ده لازم نستخدمله زيوت خفيفة زي الجوجوبا والأرجان لأن الزيوت التقيلة مش بتعرف تخترق الطبقة الخارجية.

إزاي أعرف مسامية شعري؟

هنعمل اختبار بسيط: هجيب نص كباية ماية وشعراية أو اتنين وهحط الشعراية في الكوباية. 

لو الشعر فضل طافي فوق، ده معناه إن المية مش عارفة تخترقه = شعر منخفض المسامية

لو نزل وبقى في نص الكباية = شعر متوسط المسامية

لو نزل لأسفل الكباية يبقى امتص الماية بسهولة = شعر مرتفع المسامية

- آخر معيار بعرف بيه احتياجات شعري هو مستوى البروتين فيه في مقابل مستوى الترطيب

- أي شعر بيحتاج  توازن ما بين البروتين والترطيب بحيث يكون قوي وفي نفس الوقت طري.

- الاختبار ده هيحدد لو كان الشعر محتاج ترطيب وللا بروتين:

بجيب شعراية واحدة تكون وقعت لوحدها (من غير ما أنا أشدّها) وأبلّها وأمسكها من الطرفين وأشد ّ :D 

- لو الشعراية اتقطعت فورًا يبقى الشعر فيه بروتين زيادة ومحتاج ترطيب (عادةً بيكون ناشف وبيتلعبك بسرعة)

- لو الشعر تمدد شوية وبعدين اتقطع يبقى مستوى البروتين والترطيب متوازنين (وده هنكمل في إمداده بالبروتين والترطيب للمحافظة على النوازن ده)

- لو الشعر تمدد أكتر من اللازم وبعدين اتقطع يبقى محتاج بروتين (عادةً بيكون واقف كده كأنه متكهرب)

--- الاختبار ده هيحدد نوع الماسكات اللي شعري محتاجها. مثلًا لو محتاج بروتين هعمل ماسك فيه بيض، مايونيز; لو محتاج ترطيب هعمل حمام كريم أو زيت وهبعد عن المنتجات اللي فيها بروتين كتير.

** الأسباب دي وغيرها هي اللي بتخلي منتج معين ينفع مع شعر وشعر تاني لأ، وكذلك الزيوت. مفيش حاجة اسمها زيت سحري ينفع لكل أنواع الشعر لأن ده بيعتمد على احتياج كل شعر

* جربوا تعملوا الاختبارات دي لأنها هتديكو فكرة أكبر عن أفضل منتجات مناسبة لكل واحد من غير ما أضطر إني أجرب حاجات كتير متكونش مناسبة أو تؤذي شعري، وقلولي النتيجة.

End of text  والسلام عليكم ورحمة الله. :D