The Curly Girl Method

The Curly Girl Method هي طريقة توصلتلها "لورين ماسي" مؤلفة كتاب Curly Girl: The Handbookمخصصة للعناية بالشعر الكيرلي، لكن ممكن طبعًا أي حد يطبقها عادي. الطريقة دي بتهدف في الأساس للمحافظة على شكل الشعر وإكسابه أكبر قدر من الحيوية، وبترجعله شكله الأصلي لو كان راح بسبب الفرد أو التلف. في شوية قواعد حطيتها للوصول للنتيجة دي:

- تجنب إستخدام الشامبو (عشان الSulphate اللي اتكلمنا عنه قبل كده وتسببه في جفاف الشعر)، واستبداله ببلسم.

- تجنب استخدام الفرشاة (بقدر الإمكان) لأن الاحتكاك الناتج عن رؤوس الفرشاة بيسبب تكسر الشعر. الأفضل استخدام مشط واسع.

- تجنب استخدام أي نوع من الحرارة سواء سيشوار أو مكواه على الشعر مباشرةً.

- تجنب استخدام أي منتجات تحتوي على مواد كيميائية غير قابلة للذوبان في الماء (زي السليكون والزيوت المعدنية)

- هعمل حمام كريم وحمام زيت بشكل دوري حسب احتياجه

**هستبدل الشامبو بالبلسم لتنظيف الشعر. بما إني هوقف استخدام المواد الكيميائية غير القابلة للذوبان في الماء، فأنا مش هحتاج لمواد التنظيف القوية اللي في الشامبو (الsulphate) وهقدر أعتمد على البلسم بس لتنظيف الشعر. إيه الحاجات اللي هحتاج أنظف شعري وفروة راسي منها؟؟ العرق- الجلد الميت-التراب- الزيوت الطبيعية اللي بتفرزها فروة الرأس- البلسم والكريم والزيوت المتراكمة. لحسن الحظ,المنظفات اللي بتكون في البلسم (surfactants) تقدر تتخلص من كل الحاجات دي ، لكن مهم جدًا جدًا وأنا بغسل شعري أفرك فروة راسي كويس أوي بأطراف صوابعي لمدة 5 دقائق تقريبًا عشان البلسم يقدر يتخلص من المواد دي.

**ممكن من فترة للتانية أغسل شعري بخل تفاح وماية لو حسيت إن مواد كتير تراكمت على شعري، أو أضيف عصير ليمونة للبلسم وده هيساعد كتير في تنظيفه. (ممكن أعمل الخطوة دي كل شهر مثلًا)

إيه المنتجات اللي هحتاجها لتطبيق الطريقة دي؟

1. بلسم خالي من كل المواد غير القابلة للذوبان في الماء (سليكون- زيوت معدنية- كحول) وده هستخدمه في تنظيف شعري بدل الشامبو. من الأنواع دي: Shea Moisture Conditioner, Trader Joes Tea Tree Conditioner

2. بلسم Leave-in أو كريم مرطب أسيبه في شعري، لازم بردو يكون خالي من أي مواد غير قابلة للذوبان في الماء.

-عشان ماضطرش أشتري حاجات كتير، ممكن أستخدم نفس البلسم اللي بغسل بيه شعري كـleave-in . بعد ما أغسل شعري كويس وأشطف البلسم منه، هحط تاني كمية مناسبة وأسيبه. البلسم هنا دوره الترطيب في الأساس. من المنتجات دي المناسبة للخطوة دي: Shea Moisture Coconut Milk, Cantu Curl Activator

3. جيل أو كريم مثبت أو مووس . ده دوره يحتفظ بخصل الكيرلي زي ما هي، بحيث ماتهيشّ (ضد هاش :D) بعد ما ينشف، واللي شعره كيرلي هيكون عارف المأساة اللي بتحصل لما الشعر بينشف :D . من المنتجات المناسبة للخطوة دي: Aussie Instant Gel, Shea Moisture Curl Enhancing Smoothie\Souflee

** مش لازم أشتري حاجات كتير في البداية نظرًا لارتفاع أسعارها مقارنةً بالمنتجات المتاحة في السوق، وكمان لأني هحتاج أجرب شوية لحد ما ألاقي منتجات شعري يحبها.

**إزاي أبدأ؟

عشان أبدأ محتاجة أعمل خطوات بسيطة:

- أول حاجة أتأكد إن أي منتج عندي خالي من: الٍsulphate، مشتقات السليكون، الزيوت المعدنية، الكحول المسبب للجفاف

لو لقيت حاجة كده، خير وبركة.. لو ملقيتش هنضطر آسفين نتخلص منها، أو نستخدمها لحد ما تخلص كأي إنسان مصري أصيل :D

- قبل ما أبدأ لازم أغسل شعري للمرة الأخيرة بأي شامبو عادي محتوي على sulphate عشان أتخلص من أي مواد متراكمة في شعري وأبدأ على نضافة. ولو اتبعت الطريقة صح، وأتأكدت إن أي منتج هستخدمه بعد كده خالي من المواد الممنوعة، مش هضطر أعمل الخطوة دي تاني. لكن لو حصل بالغلط إني استخدمت حاجة فيها مادة من دول، هغسل شعري مرة كمان بشامبو عادي لأن المواد دي مش بتدوب غير بالsulphate.

- بعد الشامبو، هحط كمية كبيرة من البلسم على شعري واسلكه بالراحة بمشط واسع وهو مبلول. دي الطريقة الوحيدة اللي أسلك بيها شعري، واللي هتخليني أتجنب الشد والخناقة اللي بتحصل.

- هسيب كمية من البلسم أو الكريم في شعري.

- هنشف شعري بفوطة مايكروفايبر أو تي شيرت قطن بإني أجيب شعري لقدام، وبعدين أنشفه من تحت لفوق (كأني بزقه من تحت لفوق) بحيث تفضل الخصل على شكلها من غير ما تهيش. الطريقة دي اسمها Scrunching

- هحط الكريم أو الجيل بنفس الطريقة، يعني وأنا بزق شعري لفوق. أو طريقة Praying hands بإني أحط الجيل أو الكريم على إيدي وأمرر الخصل بينهم كده 👏👏

- في كذا طريقة أنشف بيها شعري، كل واحدة هتحتاج تجرب لحد ما تلاقي أنسب طريقة ليها: السيشوار (بس مش مباشرةً، لازم أستخدم diffuser ودي القطعة اللي بتيجي مع السيشوار وبتساعد على توزيع الحرارة بحيث موجهش الحرارة لشعري مباشرةً. هنشف شعري على حرارة باردة، درجة متوسطة)- أو أسيبه ينشف من الهوا عادي بس مالمسهوش خالص لحد ما ينشف تمامًا عشان أتجنب الهيشان. أو أنشفه بطريقة plopping وهي إني أحط تي شيرت قدامي وأنزل شعري فيه بحيث يبقى مرفوع فوق راسي، وبعدين أربط التي شيرت. الطريقة دي بتحافظ عليه لحد ما ينشف ومش هعرف ألمسه فبالتالي الهيشان هيقل.

- لو استخدمت جيل أو مووس، هلاقي إن شعري بعد ما نشف بقى جامد وماسك. دي مش حاجة وحشة خالص، ده اسمه gel cast وهي الطبقة اللي عملها الجيل وهي اللي بتثبت الشعر على شكله الحالي. عشان أتخلص من الإحساس ده، هعمل نفس طريقة الscrunchingاللي عملتها قبل كده. ممكن بإيدي وممكن بتي شيرت. همسك شعري من تحت وأزقه لفوق لحد ما أحس إن الطبقة دي فكّت.

- وقت النوم، هعمل ديل حصان بس لقدام، عشان أمنع احتكاك الشعر مع المخدة، أو كحكة لفوق، أو ألبس بونيه ستان أو ألفه بطرحة ستان أو حرير لو ينفع.

- لو شعري بدأ يهيش على آخر اليوم مثلًا أو تاني يوم، هجيب بخاخة ماية وأحط فيها بلسم وأبدأ أرش الأجزاء اللي هاشت وأحط عليها جيل لو عايزة.

** مفيش معدّل مثالي لغسل الشعر، لأن دي حاجة بتترتب على نوع الماية اللي في الحنفية, وعلى احتياجي لغسل شعري. ممكن حد بيحتاج يغسل شعره كل يوم، ممكن حد يغسله مرة في الأسبوع وهكذا. الميزة في الطريقة دي إن غسل الشعر كتير مش هينشفه أوي لأني بطلت أستخدم الشامبو وكل المواد اللي بتسبب الجفاف.

• الطريقة دي فعالة جدًا في تحسين صحة الشعر، لكن سرعة النتائج بتختلف من شخص لآخر وبتعتمد على حالة شعري دلوقتي ومدى التلف اللي فيه. لكن الأكيد إن النتائج بتكون ملحوظة جدًا في شكل الشعر وحيويته، والأهم إني هكون بتعامل مع شعري على هيئته الأصلية من غير تغيير 😎

هتلاقوا في المدونة صور لتجارب ناس قبل وبعد تطبيق الcurly girl method

#ConfusedCurlies #CGmethod #CurlyGirlMethod #curls