إيه المواد الكيميائية المسببة للهيشان والجفاف؟ ازاي أعرفها؟

إيه المواد الكيميائية المسببة للهيشان والجفاف؟ ازاي أعرفها؟

-          هركز هنا على المواد اللي بتسبب هيشان أو جفاف أو تقصف للشعر الكيرلي خاصةً.

1.      في الشامبو: لو بصينا على الملصقات بتاعة معظم الشامبوهات التجارية أو الdrugstore، هنلاقي إن أول أو تاني مكوّن هو sodium laurel sulphate  أو sodium laureth sulphate  أو مشتقات تانية للsulphate. الsulphate مادة منظفة قوية بتستخدم في مواد التنظيف المنزلي (الصابون، صابون المواعين) وفي الشامبو :D  الsulphate فعال جدًا في اختراق طبقات الدهون المتراكمة على الجلد والشعر وتدويبها عشان يدينا في النهاية إحساس الانتعاش والنظافة ده. مشكلته إيه؟ مشكلته إنه مش هيفرق بين الدهون والزيوت الطبيعية اللي بتفرزها فروة الرأس والدهون المتراكمة بسبب التراب والمنتجات التانية، فبيزيل كل الدهون دي ويحرم الشعر من الاستفادة من الزيوت والعناصر الغذائية اللي محتاجها.

النتيجة؟ أول حاجة الشعر بيكون جاف وهايش لأن مفيش زيوت بتوصلّه. ثانيًا، فروة الرأس تدي إشارات للغدد الدهنية إن مفيهاش زيوت، فالغدد تبدأ تفرز زيوت بكميات زائدة، فيبقى النتيجة النهائية فروة رأس فيها زيوت زيادة (بتؤدي إلى ظهور القشرة أو سقوط الشعر)  وفي نفس الوقت الشعر هايش وجاف لأن الزيوت دي مش بتوصله.

طيب ليه الشركات بتستخدم المادة دي لو هي ضارة كده؟

أولا لأنها رخيصة جدًا مقارنةُ بالمنظفات الأقل ضررًا. ثانيًا إن معظم أنواع البلسم\الكريم\السيرم بتحتوي على سليكون، والسليكون مش بيدوب غير بمنظف قوي زي الsulphate.

والحل؟ استخدام أنواع شامبو خالية من الsulphate. للأسف هي مش متوفرة بكثرة في البلاد العربية وأغلى بكتير من الشامبوهات العادية، لكن الموضوع يستاهل لو بصينا للأضرار. في حل تاني وهو استبدال الشامبو بالبلسم. البلسم بيحتوي على منظفات surfactants)) لكنها ألطف على الشعر بكتير من الsulphate، بس لازم تدليك فروة الرأس كويس بالبلسم (لخمس دقائق تقريبًا علشان ينضف كويس).

2.      في البلسم\الكريم\السيرم: السليكون. السليكون بيغلف الطبقة الخارجية للشعراية وبالتالي بيقلل الهيشان ويدي الشعر مظهر لامع، بس في مشكلة بسيطة وهي إنه مش بيدوب في الماء، فلو مغسلتش شعري بشامبو فيه منظف قوي زي الsulphate، طبقات السليكون بتفضل تتراكم فوق فروة الرأس فتمنع إفراز الزيوت الطبيعية، وتتراكم فوق الشعر نفسه، فتخليه ناشف ومتقصف وعرضه للتكسر بسهولة. الموضوع حلقة مفرغة لأني هفضل أستخدم Sulphateعلشان أشيل السليكون، وبعدين أستخدم سليكون عشان أصلح الجفاف اللي عمله الsulphate، ومينفعش أوقف استخدام واحد منهم من غير ما أوقف استخدام التاني عشان الشعر يبدأ يتحسن.

-          إزاي أعرف إن البلسم أو الكريم في سليكون؟ مشتقات السليكون كتير، لكن معظمها بينتهي بالنهايات دي: -cone, -conol, -xane. أمثلة: dimethicone، dimethiconol، cyclopentasiloxane.

ملاحظة: في أنواع من السليكون بتتعالج كيميائيًا بحيث بتدوب في الماية وتعتبر آمنة، بعرفها لما ألاقي المادة الكيميائية بادئة بــ PEG  أو  PPG.  مثال: PEG-12 Dimethicone.

-          كتير من أنواع البلسم والكريم بردو بتحتوي على زيوت معدنية (mineral Oils) وشمع (wax) بتؤدي نفس وظيفة السليكون وبردو مش بتدوب في الماية، فالأفضل تجنبها.

3.      الكريم\السيرم: في أنواع من الكحول مش ضارة لو كانت في الشامبو والبلسم لأنه بيتغسل، لكن المشكلة بتحصل في الكريمات والسيرم لأنه الأنواع دي بتسبب جفاف لو فضلت على الشعر لفترات طويلة. أشهر الأنواع دي: ال denatured alcohol وال propyl alcohol.

قاعدة مهمة: ترتيب المكونات على الملصقات ليه دلالة، فالمواد الكيميائية بتترتب على حسب نسبتها في المنتج، يعني المواد المذكورة في البداية نسبتها أكبر من اللي بعدها وهكذا.

-          تحذير هام: في شركات بتحاول تصيع وتبيع شامبو مثلًا على أساس إنه آمن وتقول إنه خالي من السليكون، بينما الشامبو أصلًا طبيعي إنه يكون خالي من السليكون، ولو بصينا على المكونات هنلاقي إن فيه sulphate عادي. نفس الأمر ينطبق على اللي يبيع بلسم ويقول إنه خالي من الsulphate، مع إن ده الطبيعي أصلًا لأن الsulphate منظف ومش بيكون في البلسم من الأساس. اصحوا ليغفلونا  :D . 

- دي قائمة كاملة لكل مشتقات الsulphate: 

Alkylbenzene sulfonates Alkyl Benzene Sulfonate

Ammonium laureth sulfate Ammonium lauryl sulfate

Ammonium Xylenesulfonate Sodium C14-16 Olefin Sulfonate

Sodium cocoyl sarcosinate Sodium laureth sulfate

Sodium lauryl sulfate Sodium lauryl sulfoacetate

Sodium myreth sulfate Sodium Xylenesulfonate

TEA-dodecylbenzenesulfonate Ethyl PEG-15 cocamine sulfate

Dioctyl sodium sulfosuccinate

قائمة لمشتقات السليكون:

Dimethicone Bisaminopropyl dimethicone

Cetearyl methicone Cetyl Dimethicone

Cyclopentasiloxane Stearoxy Dimethicone

Stearyl Dimethicone Trimethylsilylamodimethicone

Amodimethicone Dimethicone

Dimethiconol Behenoxy Phenyl trimethicone

قائمة للزيوت المعدنية والشمع:

Mineral oil (parrifidium liquidium)

Petrolatum/petroleum

Waxes: bees wax, candelia wax etc, lanolin

قائمة لأنواع الكحول المسببة للجفاف:

Denatured alcohol SD alcohol 40

Witch hazel Isopropanol

Ethanol SD alcohol

Propanol Propyl alcohol

Isopropyl alcohol